اليوم الثالث

ستيك مع المشروم والبصل 

هكتبلكم المكونات 

ربع كيلو لحم ستيك ( انتركوت او من الفخدة )
جرجير
بصلة صغيرة مقطعه دوائر 
مشروم مقطع دوائر 
خل ابيض ( بس انا استخدمت خل تفاح وكان طعمه احلى بكتير )  
معلقة زيت زيتون 

نشوى اللحم على الفحم ولو ماعندكمش شواية فحم ممكن نشويها على الجريل على النار عادى 


وفى اناء اخر نوضع الزيت ونضع البصل حتى يذبل ونضع المشروم والخل 

ونضع الجرجير فى طبق التقديم وعليه اللحم وعليه المشروم والبصل 

وعلى فكرة طلعت تجنن وسهل وبسيطة اوى 


السلطة 
سلطة الزبادى

 هتكون حلوة مع الاكلة دى  
هنجيب علبهة زبادة 
وخيارة 
2 فص ثوم صغير ورشه ملح بسيطة

نقشر الخيارة ثم نبشرها ونضعها على الزباردى ونفرم الثوم ونضعه والملح ونقلب كويس اوى لحد ما المكونات كلها تمتزج مع بعض 

الاكله دى ممكن تقدم مع ارز هتبقى مناسبه اوى :)

meetloaf

اليوم الثانى :) 

ميت لووف

عملت على الغدا ميت لوف طريقتها سهلو اوى وبطلع حلوة اوى انا عاداً مش من محبى اللحم المفروم بس دى كانت مختلفة 

جبت نص لحم مفروم وحطيت عليه بيضه وملح وفلفل وجوزة الطيب وبصلة مفرومة وبقدونس لو حابين وبعدين حطيتهن فى صينية مستطيلة ونضغط عليها كويس 

(وممكن اوى نعملها فى قالب الكب كيك وهتطلع شبه الكب كيك وبيبقى شكلها تحفه )

وبعدين نغطيها بورق فويل لندخلها الفرن لمدة 45 دقيقة وبعدين نشيل الفويل ونسيبها لحد ماتستوى تقريبا هتاخد ساعة كمان بس الوقت بيختلف حسب حرارة الفرن 

نصيحة وانتى بتجيبى اللحم المفروم بلاش يكون فى دهنة كتير عشان مايعملش ريم كتير ومش بيطلع حلو 

لو حابه يكون جمبها صوص جربى الصوص دا 

2 ملعقة مستردة و2 ملعقة كاتشب وملعقة عسل نحل 

ممكن نعمل معاها مكرونة بالبشاميل او مكرونة بالصلصة او زى ماتحبوا 

الحلو 

براونيز 

واحد وربع كوب شيكولاتة خام يذاب فى ذبدة ( فى حمام ماء )

2 بيضة وفانيليا ونصف كوب سكر 

نضرب البيض مع السكر مع 2 معلقة كبيرة كريمة 

ونحط اللدقيق فى مصفاه مع البيكنج بودر وبعدين نحط الشيكولاتة الخام ونحطهم فى صينية وندخلها الفرن ( لازم يكون الفرن سخن من قبلها ) وونسيبهم تقريباً نصف ساعة 

طبق سلطة :)

لما تصحى من النوم وتلاقى الفطار متحضر  وتلاقى طبق سلطة بالجمال  دا 

اكيد اليوم كله هيبقى حلو وهتحس ان عندك طاقة ايجابية كبيرة وهتعوز تطلع احسن ماعندك 

دا الى حصل تقريبا 

قمت الصبح لاقيت الطبق دا :) 

قولت مابدهاش بقى على الغدا لازم اعمل حاجة هو بيحبها وابدع فيها :D 

ماشى هى مش حاجة صعبة انا عارفة بس طلعت تجنن :)

 انهــــا 

بامية باللحمة 

طيب هكتبلكم المقادير الاول هبدأ بتجهيز اللحمة 

هنحط حله فيها ماء على النار ونحط فى الماء فلف اسود وملح وجوزة الطيب وحبها  وورق لورى ومستكة عود قرفة بصلة ثمرة طماطم وثوم  وفلفل اخضر حامى لو حابين

اول ماتغلى نحط اللحمة ونسويها نص سوه عشان عتكمل سواها بعد كدة مع البامية 

نجيى بقى للبامية 

 هنجيب بصلة ونبشرها ونشوحها على النار ثم نضيف 2 ملعقة كبيرة صلصة ونضيف كوب من مرق اللحم الى عملناه  وشوية زيت ونسيب الصلصة لحد ماتتسبك 

نحط ملح وفلفل وبعدين نحط البامية ونحط اللحمة قرب ما البامية تستوى نحط فص ثوم مبشور 

الأرز بالشعرية

نغسل 2 كوب من الارز جيداً وونسيبة فى الماء ساعة تقريباً 

حله على النار وفيها معلقة سمن وبعدين لما السمن تقدح نحط الشعرية لحد ما لونها 

يحمر نحط 2 كوب ماء ولما يغلى نحط الأرز ونوطى النار عليها لحد مايستوى 

سلطة يونانية

الطماطم  تقطع دوائر

خيار يقطع دوائر 

طماطم شيرى

بصل حلقات

فلفل اخضر حلقات 

شبت 

نعناع

زيت زيتون 

خل تفاح 

ملح 

طبعاً نسيبها شوية عشان المكونات دى تمتزج ببعض وتتبل :) 

الحلو 

تيجر كيك 

انا بحب اوى اعمل الكيك بالبن الرايب بيبقى تحفة  جربوه على ضمانتى :) 

انا فى الكيك بخلط المقادير السائلة الاول وبعدين بضيفها على المقاديير الصلبة 

 فى الاول هنجيب بوول ونحط كوب زبدة سايلة او زيت لو عايزين ووكوب ونصف سكر و 3 بيض وفانيليا ونخلطهم كويس اوى لحد مايبقى ملمسهم كريمى وبعدين نضع كوب لبن رايب 

نيجى بقى للمقادير الصلبة هجيب 2 بوول واحد هحط فيه 2 ونصف كوب دقيق ومعلقة صغيرة بيكنج بودر وذرة ملح والبوول الثانى هحط فيه اقل من صف كوب دقيق ومعلقة كاكاو ( انا بستخدم هنتز طعمة حلو اوى ) ممكن تستخدمه نيسكويك طعمة احلى من الكاكاو الخام بصراحة انا مش بيظبط معايا الخام دا 

بس لو هتستخدمه نيسكويك يبقى تحطوا اكتر من معلقة تقريبا 3 كيس صغير عشان دا بيبقى خفيف شوية ونحط برده ذرة ملح ونصف معلقة بيكنجبودر 

وبعدين نحط بقى الخليط السائل الى عملناه فى الاول لحد ما نوصل للقوام الى احنا عايزينه فى الاتنين 

نجيب صنية الى هنعمل فيها الكيك ونغطيها بالزيت وبعدين شوية دقيق عشان نعمل طبقة عازلة او لو حابين استخدموا ورق زبده 

 ونبدأ نحط  ملعقتين من الخليط الابيض ومعلقة من خليط الشيكولاته  وها كذا

اهم حاجة فى الفرن لازم يكون سخن على 180 تقريباً واوعوا تفتحوا عليها الفرن اول نصف ساعة ونشغل الفرن من تحت بس تقريبا هتاخد ساعة :) 

فكرة جديدة

اجمل حاجة فى الدنيا انك تلاقى انسان تحبه والاجمل ان يكون هو كمان بيحبك
دى كخطوة اولى

كخطوة تانية عشان يكون فى علاقة ناجحة 

انك تقدر تتفاهم مع الانسان دا يحترمك وتحترمه يكون واثق فيك وانت كمان واثق فيه يكون بيقدر دماغك وتفكيرك

كدة بالتأكيد هتكون علاقة ناحجة 

بس عافين ايه بقى كمان بيحلى الموضوع دا انه يشجعك على حاجة انت بتحبها ويحببك فيها زيادة ويخليك توصل للى انت عايزة وبتحلم بيه 

انه يكون واثق فى قدراتك اكتر مانت واثق فيها ويكون متأكد اكتر منك انك هتوصل وتنجح 

احساس حلو اوى

الحمدلله ان ربنا رزقنى بزوج كدة .. 

رغم المشاكل ورغم خلافاتنا بس فى الاخر احنا بنحب بعض وعايزين ننجح فى حياتنا

من الحاجات الى شجعنى عليها هى الطبخ .. افتكر ان قبل الخطوة وحتى بعد للخطوبة بفترة ماكنتش بعرف ادخل المطبخ
ولا كنت بحبه ابداً 
طلب هو منى فى مرة انى اعمل اكل وسمعت كلامه والحمدلله طلع كويس رغم انى كنت اول مرة اطبخ طبعاً دا بتعليمات من ماما بس الفكرة انه اول ما اكل منه قالى ان نفسى حلو اوى فى الطبخ غير ماكان متوقع :D

بدأت ادخل المطبخ واتعلم واحدة واحدة كنت اوقات كتير بعك الدنيا ودا طبيعى فى حالتى دى :D

بعد الجواز الوضع اتغير بدأت اتفرج على برامج طبخ وبدأت اجيب كتب .. ساعات كنت بنجح وساعات كنت بفشل بس الحمدلله فى اغلب الاوقات كنت بنجح وكنت بعمل افتكاسات كدة فى الاكل من عندى وكانت بتظبط

فى يوم من الايام جيه قالى انى بطبخ حلو وقالى ليه ماتكتبيش الوصفات الى بتعمليها سواء الى كنت بفتكسها او كنت بجمعها من برامج او كتب للطبخ

عجبتنى الفكرة وقولت انى هكتب كل وصفة عملتها وطلعت كويسة
وقررت انى اكتبها على المدونة بتاعتى
رغم انى عارفة ان مافيش ناس كتير بتدخل عندى بس انا متأكدة انى حتى الى بيدخلوا لو كان عددهم صغير فممكن يستفيدوا 

انا عارفة ان معظم المواضيع الى على المدونة تخص المرأة والدفاع عن حققوها وما الى ذلك لكن كمان

 الطبخ والمطبخ من اكتر الحاجت الى ممكن تخلى الست فى قمه ساعتها وخصوصا لما يرجع جوزها من الشغل ويعجبه الاكل وقتها مافيش حاجة ممكن تفرح الست اكتر من كدة :)