لكل ولد مفكر نفسه مقطع السمكة وديلها وانه فاهم البنات وفاهم حركاتهم احب اقولك
ان لما بنت تقعد تجهز نفسها ساعتين قبل ماتنزل دا مش عشان تعجب سعادتك ولا عشان تنول الرضا وتسمعها كلمتين منك وهى معدية فى الشارع
البنت انسان من حقها انها تلبس الى شايفاه حلو عليها وتحط مكياج وتطلع حلوة قدام نفسها مش عشان زى مانت مفكر
لكل ولد بيقول البنت هى الى بتجبر الولد انه يتحرش بيها احب اقولك ان الى انت بتقوله ده اى كلام وخلاص تدارى بيه خبتك المفروض انك لو راجل وفاهم معنى الكلمة دى كويس لو شفت بنت عريانة فى الشارع تغطيها وتحميها عشان ماحدش يبصلها
لكل ولد مفكر ان المجتمع ظالمه وانه مش عارف يشتغل ولا يتجوز فبيفرغ شحنته فى اى بنت معدية انه يتحرش بيها او يقولها كلام يخدش حياءها احب اقولك ان نسبة العنوسة فى البنات اكتر من الولاد وعادى عايشين
هى غريزة اه لكن مش اساسية يعنى من غيرها مش هتموت
ياريت كل ولد يحط نفسه مكان البنت ولو ل 5 دقايق , احنا قبل ما بننزل بنفكر هنلبس ايه وهنمشى من اى شارع ولما نجى نروح نعمل حسابنا فى الوقت مش بعد 10 بليل عشان نقدر نركب مواصلات , الف فكرة بتيجى فى دماغنا قبل ماننزل من البيت عشان ماحدش يتعرض لينا
نفسى امشى فى شارع آمن واركب مواصلات وماحدش يمد ايه او يبص او يقول كلمه تخدش حيائى
نفسى وانا بعدى من اى نفق ماجريش عشان انا فيه لوحدى او فيه ولد ورايا وخايفة يعملى حاجة
نفسى امشى وابقى متأكدة ان لو حد اتعرضلى هلاقى الف واحد يدافع عنى
نفسى مابقاش خايفة وانا ماشية فى الشارع
لا للتحـــــرش , لا للإهــــانه
